Laugardagur 1. október 2011

Vetrarstarf Kórs Akraneskirkju

 

Vetrarstarf Kórs Akraneskirkju hófst um miðjan september. 50 félagar hófu söngstarf af krafti og fyrsta verkefni vetrarins eru tónleikar í Reykholti, sunnudaginn 9. október kl. 16.

 

Þar mun kórinn flytja m.a. lög af nýlegum geisladiski sem ber heitið Á hverjum degi. Á honum má heyra kórútsetningar Gunnars Gunnarssonar organista Laugarneskirkju. Einnig mun á tónleikunum hljóma veraldleg kórtónlist eftir íslenska ljóða- og lagahöfunda.

 

Um miðjan nóvember, eða í kringum Dag íslenkrar tungu, mun kórinn síðan flytja alíslenska dagskrá sem að mestu er byggð á velheppnuðum kaffihúsakvöldum sem fram fóru í lok apríl á þessu ári. Þar voru gömlu, góðu Skólaljóðunum gerð góð skil í tali og tónum. Leiklistarhæfileikar og jafnvel tónskáldahæfileikar kórfélaga munu fá að njóta sín.

 

Sannkallaðir stórtónleikar verða síðan á nýju ári. 7. janúar 2012 verða haldnir nýárstónleikar í Tónbergi, sal Tónlistarkólans á Akranesi. Fluttur verður kórlagaflokkur eftir jazzpíanistann George Shearing sem hann samdi við sonnettur eftir Shakespeare. Þetta er frábært tónlist eftir þennan heimsfræga snilling. George Shearing fæddist blindur en hóf ungur að leika á píanó og átti glæsilegan feril. Hann lést 14. febrúar síðastliðinn. 

 

Þessi lagaflokkur hefur ekki verið fluttur á Íslandi og má því segja að um tónlistarviðburð sé að ræða. Á nýárstónleikunum munu einnig hljóma dægurperlur eftir Freymóð Jóhannesson (12. september) í nýjum kórútsetningum, ásamt öðru vel völdu efni.

 

Á vordögum er síðan fyrirhuguð utanlandsferð og má því segja að í nógu sé að snúast hjá kórnum. Við Akraneskirkju vinna kórfélgar fórnfúst og mikilvægt starf sem er í senn gefandi og skemmtilegt.